Panata Adicara

TULADHA ATUR PAMBUKA PANATA CARA PASRAH PANAMPANING LAMARAN

Bismillahirrohmanirrohim

Assalamualaikum Wr. Wb.

Panjenenganipun para pepundhen, para sesepuh, para pini sepuh ingkang hanggung mastuti dhumateng pepoyaning kautaman ingkang pantes pinundhi, para duta saraya saking kadang besan sutresna ingkang pantes kinurmatan, para lenggah kakung putri, kadang wredha mudha ingkang winantu suka basuki.

Mradapa keparingipun Bp.   Sumarmo ekaliyan sumambrah para kulawangsa ing kalenggahan unika, kula piniji pinangka pambiwara wontenipun upacara pasrah panampining upakarti miwah laaran pinangka jejangkeping tata cara salaki rabi.

Namung saderengipun kula ngaturaken urut reroncenging adi cara ingkang sampun karakit dening para kulawarga, cundhu kalihan kuncaaning bangsa ingkang linambaran agunging  Pancasila  saha hangemban Eka Prasetya Panca Karsa, sumangga nun kula dherekaken ngaturaken puji syukur wonten ngarsa dalem Alloh ingkang maha agung, karana ageng barokah saha rohmat ingkang sampun kaparingaken dhumateng panjenengan sadaya dalasan kula.

Sinawung raos syukur ing ngajeng, mugi lampahing adi cara pasra panampi lamaran saha upakarti pinangka jejangkeping palarama tansah pnaringan rahayu tebih ing sambekala.

Nun inggih para lenggah ingkang sinuba ing pakurmatan, keparenga panata cara murwani lekasing sedya ingkang punika enggal badhe binuka lampahing upacara pasrah panampi kanthi ngaturaken reroncening adicara ingkang rinantan para kulawangsa.

Nun inggih, tinarbuka atur pambagyaharjo saking ingkang hamengku gati dening tetuwangga ingkang sampun piniji.

Atur lamaran miwah upakarti dening pangarsaning duta saraya pinangka sulih saliranipun saking badhe/calon kadang besan.

Atur panampi dening tetuwangga ingkang pinangka sulih saliranipun Bp Sumarmo ingkang mengku gati.

Kalesananing adi cara liru kalpika  (menawi wonten).

Tanggap wacana sawatawis saking pinisepuh pnangka tumuju dhumateng kasaenan (menawi wonten)

Paripurnaning kasaenan sedya hambok bilih ing mangke wonten pratanha saking kulawarga minangka paran para.

Makaten para tamu saha para lenggah urut reroncening  tata adi cara pasrah lamaran ingkang sinaggit dening para kulawarga , kasuwun wontena suka lilaning penggalih para lenggah tansah hanjenengi ngantos dumug purnaning gati.

Nuwun, nuwun, matur nuwun.

Wassalamu’alaikum Wr. Wb

Sumbere saka Bp R.M.T. Warsito Pinilih