Kasarasan

Barokahe Yen Kita Tangi Esuk

 

Dening : Drs.H.Toewadji S.

Salah sawijining upaya kanggo pambiyantu nylametake lan njaga marang keslametaning awak sarta nikmati marang kasarasan lan kekuataning awak, yaiku netepi hak-e awak, awujud istirahat kang samadya (tidak berlebihan). Ora kok banjur ngombe kopi sing ginastel (legi panas tur kenthel). Pakarti kang mangkene iki, ateges ora netepi hak-e mripat kang samestine kudu istirahat. Mangkono sapiturute. Ya ngene iki sing dadi kawigatene para ahli medhis, trep karo kasunyatan sing dialami dening anggota masyarakat.

Kajaba saka iku supaya luwih mantep, coba kita priksani katerangan kang dipethik saka “kitab Al’Haqiqatuth Tibbiyah fil Ilam antara liya nerangake mangkene : “Manungsa mono awake ndarbeni hak istirahat, ing pangangkah supaya uteg bisa istirahat, syaraf-syaraf bisa tentrem (tenang), semono uga otot-otot ora kaku (tegang). Kanthi mangkono, geger (pinggang) ati, paru-paru sarta sakabehing anggota badan kita bisa krasa lerem (nyaman).

Kabeh mau yen dinalar, pranyata istirahat sarana turu iku ndarbeni hikmah, Kita bisa kalis saka sakwernane gangguan sing mengaruhi jiwa lan pikiran kita. Iki trep karo dhawuhe Allah mangkene jarwane, kurang luwih:

a.     Nalika Alloh nglimputake rasa ngantuk marang sira kabeh, amrih tentreme.... (Q.S Al-anfal (8):11).

b.     Alloh banjur nuwuhake marang sira kabeh katentreman sawuse kasusahan, yaiku marang golongan saka sira padha liyep-liyep ngantuk. Dene golongan liyane padha katungkul (mentingake) marang awake dhewe............(Q.S. Ali Im’ran  (3):54).

c.      Lan Ingsun andadekake anggon sira turu minangka ngaso (istiahat)....(An-Naba) (78) :9).

Dadine wigati banget, kita kudu istirahat (ngaso)saka sapangangkah supaya awak (badan) mau ngaso. Iki mau pratandha yekti kekuwasaning Allah, yaiku turune manungsa ing wengi lan rina sarta upaya ngudi kanugrahaning Pangeran kang maha kuwasa. Dhawuhe Allah cetha banget: “Lan saka sawenehe tandha yekti kasampurnane kekuasaane Allah, yaiku anggonira turu ing wayah wengi kanggo ngaso, sarta sira ngupadi rejeki kanugrahan ing wayah awan....” (Q.S. Ar-Rum (30): 23).

Gemblenge mono, manawa kita ndarbeni kawigaten marang pituduh –pituduh Al-Qur’anul Karim sarta hadist Rasululloh SAW. Kaya kang wus kaatur ing ndhuwur, kita bisa methik manfaat kaya kang wus dianjurake dening para dr. Spesialis ing babagan iki. Antara liya nerangake , menawa: “Prabeda antara turu wayah wengi lan turu wayah awan, yaiku : Turu ing wayah wengi manfaate luwih gedhe. Ing kene awak bisa ngrasakake manfaat kang matikel, tinimbang turu awan. Sebabe, turu ing wayah awan kang kebak kesemrawutan (kebisingan), sarta sinar Srengenge sing panas, kabeh mau darbe pengaruh marang sistem syarafe manungsa.

Para ilmuwan wus kasil nemtokake kelenjar sing karan “kelenjar Pineal”, sing dumunung ana ing uteg, darbe fungsine ngasilake zat”melatonin”,Prodhuksi zat iki bisa luwih akeh, nalika swasana dadi peteng dhedhet. Dene yen wektu awan karana cahya (sinar) iku sing dadi pepalang (penghalang), ora bisa ngasilake zat kasebut. Zat melatonin iku ndarbeni pengaruh langsung nalika kita turu.

Petenge wengi kang binarung ketentremaning wengi (wengi kang tentrem), mandhege samubarang aktifitas, cahya Rembulan purnama sidi ing wengi iku, kabeh njurung marang tuwuhing swasana nyaman, saengga kita bisa istirahat

Secara sains wus cetha (terbukti), manawa kadar ultra violet banget efektif nalika wektu fajar. Cahya esuk iku bisa njurung marang kulit bisa ngasilake vitamin D.

Kajaba saka iku, kanthi nyimak apa kang wus katur ing ndhuwur, pranyata gumantine wayah rina lan wayah wengi, iku ngandhut makna kang mirunggan. Hikmahe, sok sapa wonge kang bisa manfaatake kanthi ibadah lan amaliyah trep karo tuntunan syar’i lan tuladha ing babagan medhis, bakal nuwuhake kanugrahan Donya lan Akhirat. Dene pawongan kang nglirwakake ing babagan iki bakal kapitunan uripe becik ing Donya tumekeng Akhirate.

Mangkono Pak Prap sing bisa dakaturake , muga muga panjenengan bisa tambah kaweruh ilmu agama Islam sarta kalebu ewoning pawongan kang bisa manfaatake gumatine wayah rina lan wayah wengi sarta ngalab berkahe wungu esuk, becik miturut wawasan syar’i lan medhis. Kita nyuwun marang Gusti Allah Dzat Kang Maha Kuwasa, aja nganti kita klendran sarta kapitunan ing tembe burine. Nuwun.

Kapethik saka Panjebar Semangat maret 2011