Kasarasan

Carane Nambani Maneka Jamur Kulit

Dening :dr H.Rasyid M. Tauhid-al-amien,Msc., DipHPED

Ora sethithikwong kang ora nggatekake kulite , kamangka kulit bisa uga kena diobati. Malah ana uga infeksi kulit kang banjur bisa nuwuhakeremantik utawa lara liyane, upamane yen ineksine mau dujalari dening kroma kang karan Streptococcus hemolyticus. Infeksi ing kulit bisa uga diwiwiti dening werna-werna kroma, bakteri, virus , jamur, utawa cacing. Kroma iki bisa thukul ing lapisan kulit paling njaba, ana ing lapisan kang luwih jero, utawa ing jaringan sangisore maneh saka kulit.

Wedharan

Yen ana jamur kang thukul ing kulit, jamure mesthi bae ora padha karo jamurkang sering dienggo masak kae, jamur kang thukul ana ing kulit iki jamur kang khusus, kang bisane katon yen dipriksa nganggo mikroskop. Kanthi pamriksan ing kulit saliyane bisa manerteni pancen saka jamur apa merga liyane, denen yen sebab saka jamur banjur jamur mau klebu bangsa apa, awit obat kanggo jamur kulit ora mesthi padha.

Bangsa jamur kang nukulake infeksi ing kulit bisa kagolongake kanthi sebutan bangsa Dermatophyte (Dermatofita) lan bangsa yeast (ragi). Dermatofita kuwi klebu kang paling umum nuwuhake infeksi kulit. Jamur iki ora bisa thukul ing lapisan kulit kang jero, mulane sering katon thukul ing kang kulit kawitan arupa bunderan-bunderan mbisik kang tansaya amba. Pinggirane bunderan iki katon mrintis katon luwih coklat utawa abang, awit ing panggonan kulit mau jamur iku lagi thukul.

Dermatofita kang bisa thukul ing kulit ora kok mung sawerna, nanging bisa akeh. Kena diarani yen perangan awak siji lan sijine biasane uga bisa dithukuli jamur kang ora padha jinise. Senadyan padha-padha lara jamuren. Saben wong ora mesthi padha wujude, apa maneh yen ora padha resikone, Ana wong kang nalika kena lara kulit jamuren mau nanging kang katon ora khas jamur iki, yaiku muncule gatel-gatel kang sejatine reaksi alergi saka anane jamur mau, saengga nalika lagi saka anane jamur mau, saengga nalika mertamba jamure bisa ora konangan.

Jamur kang asring thukul ing sikil kang karan Tinea Pedis, nuwuhake gatel kang nemen, jamur  iki ndadekake kulit mbesisik utawa sok nukulake radang (mbranang, kemeng). Sarehne jamur seneng panggonan teles nanging anget, mulane manggone ing cepitan selane driji, luwih-luwih yen tansah nganggo sepatu rapet, lan kasut sikil saka nylon. Kasut iki katutan bibite (spora) nalikane kasut iki dicopot utawa dikumbah. Ing kalangan olahragawan tular-tinulaan bisa kedaden ing lemari sandhangan utawa ing ruang ganti klambi awit saka sinebare bibit mau ing lemari utawa tegel kamar. Mulane jamur iki ora sethithik kang uga thukul ing tangan, dlamakan, lan selane jliji.

Tinea Cruris kang umume thukul ing langkangan bisa nemen banget gatele. Jamur bisa tumeka kene iki awit tinularan saka sandhangan, andhuk, utawa sprei. Sarehne jamur kuwi seneng panggonan kang teles nanging anget, mula wong kang kringeten akeh luwih gampang kena jamur.

Jamur kang thukul ing sirah karan Tinea Capitis gatel nemen, yen  tuwuhe ing panggonan thukule rambut sering sinebut ketombe. Awit saka gatele mau sirah banjur asring dikukur kang sebanjure nggampangake rontoge rambut.

Dene Tinea corporis thukule ing awak (gambung) yaiku ing dhadha, geger , weteng, thukule ing panggonan kang luwih alus. Jamur iki klebu luwih gampang nular awit sporane bisa nempel ana ing sandangan, andhuk, kuri, bekase tukang cukur kang kurang resikan, sato kewan kang ketularan uga bisa nulari wong.

 Infeksi jamur kang kena diarani paling akeh nganti wis dianggep lumrah diarani panu kang ing kalangan dokter karan Tinea versicolor utawa Pityriasis versicolor. Jamur iki sok ora nuwuhake gatel utawa kemeng babar pisan. Kang keton yen kena jamur iki kulite dadi owah wernane , nyeje saka asline. Malah ing kawitan kulit ora beda karo liyane, mulane katone yen wis rada nemen, kang ana kalane uga kulit dadi ireng.

Bangsa jamu liyane ana kang karan Candida, bangsane ragi, saliyane  Thukul ing kulit, bisa uga thukul ing “kulit” tutuk, suus, lan pawadonan Jamur kandida iki kalebu subur ing panggonan kang teles, mula uga sering thukul ing kelek lan slakangan. Wong kang pegaweyane ing panggonan kang teles gampang kena jamur iki awit tangan lan sikile tansah teles. Yen jamur iki thukul ing kuku mula kudu iki bisa mrepel utawa mumut, kuku mau bisa ilang.

Obate

Kaya kang dak aturake ing ndhuwur yen bangsa jamur kuwi uga akeh, kang siji lan sijine uga beda “kekuwatane” mula obat kanggo saben jamur sijine ora mesthi bisa marasake saka jamur liyane, saengga dyan ana ugaa obat kang bisa marasake meh kabeh jamur (broad spectrum). Mulane jamur apa kang sinandhang. Adate asil saka pamriksan nganggo mikroskop wis bisa kanggo ngarani apa obate.

Akeh obat kang didol kanggo ngobati jamur kulit iki. Kang paling gampang arupa obat oles kanggo “ngerok” kulit (keratolytic), ngilangi jamur kang ana lapisan kulit kang paling njaba. Kang luwih jangkep uga ditambahi obat alergi. Obat kang mangkene iki ana kang entheng ana uga kang klebu “keras” gumantung  bahan apa ang dicampur kanggo racikane.  Obat tradisional jaman biyen ana kang thukule ing kulit, nanging “oyot-e” uga ora ana ing kulit perangan njaba. Mulane yen diobati saka njaba bae warase bisa ora tuntas, thukul maneh  mengkone. Dadi sepisan bae bakal thukul maneh, Mulane yen nganggo obat oles (salep, krim utawa “cairan”) nganggone ora cukup mung sedina rong dina, nanging kudu jangkep ngenteni thukule kulit kang wis tinukulan oyote, ora kurang saka patang  minggu. Saliyane obat oles uga nganggo obat kang diombe (pil, tablet, yen wis ana), warase jamur bisa luwih cepet. Obat-obat iki (upamane fluconozole, griseofulvin, itraconazole, ketoconazole, terbifaline) bakal sumeleh ing kulit ing paling njero, bakal nyegah yen arep ana oyot jamur kang thukule ing kono mengkone.

Saliyane obat kang kanggo mateni jamur, yen gatele nemen pasen kudu ditulung ngilangi rasa gatel mau kanthi obat antihistamin. Obat bangsa iki ana kang nuwuhake ngantuk, nanging uga ana kang ora (mung bae, obat iki regane luwih larang). Mulane yen mertamba aja lali matur gatele ngganggu apa ora, apa maneh yen duwe bakat alergi.

Saran

Sanadyan gangguwane ora sepiroa nanging lara kulit (jamuren) aja dianggep entheng. Gatele wis bisa ngganggu tandang gawe, durung maneh yen saka gatele nggampangake infeksi saka kroma liyane melu-melu thukul, mula kudu diobati. Dene supaya ora gampang nulari utawa uga ketularen, aja sok ijol-ijolan sandhangan.

Nuwun

Sumbere saka Panjebar Semangat Oktober  2000