Geguritan

Balada 

Katresnan Segara Biru

Candrane nggandul ana ing tawang
Lahir saktengahing wayah  kang lagi padhang Jembrang
Disekseni  Suminare Surya
Pas sakndhuwur mustaka
banjur di jenengi Rina,
Awujud karunia lan rahmat saking Gusti kang makarya
ngganda arum kadya Kusuma
Kusumaning ati ,bangsa lan negara
Iku pepujine wong tuwa
Aku namung bisa usaha lan uga dedonga
Mugi-mugi bisa kalaksana

Rina kurnia Sari
Jangkepe
17 Oktober 1995 iku  kelairane
Watone tansah di rahasiaake
dhawuhe si mbah mbiyene
Hadi Proyono  Asmanipun bapake
Lan Admini Simboke
Ana sawah pegaweane
Nggulawentah pari lan sejenise

Tumiba cahyaning surya
saka sisih wetan bebarengan wayah rahina
Suminare mencorot  siyap siyaga
Amadhangi jagad raya
Miwiti kuwajibane manungsa ana ndunya
Nandhur kabecikan lan makarya
Tansah ambudidaya,,

Ing tegalan sumurup rombongan
Caping nggunung bebarisan
sandale ya.. namung samparan
pusaka pacul lan arit kagawan
Nora ketinggalan kebo kewan
kanggo mbiyantu pegawean saben padinan
Kanthi lila lan legawa

Ing  mburitan dhewek tepungan
Sineksen wit gedhang jinejeran
nglampahi tegalan
Ginawa sakwernaning panganan

Kawadhah rerantangan kang abunthel godhong gedhang
Kanggo bapak biyung sakperangan

Sepi...
Langka...
Ora ana...
Saiki sliramu uwis lunga
Nadyan Cedhak umah
Sing  kapisah kalitengah
jebul ora ninggalake bungah
malah sedhih lan susah
marga pepisah..

Maware mekrok warna abang

Srengenge tansah ngawe-awe
Ngoyag uwong padha nyambut gawe
Dalane pancen katon reme
Tumuju pasar wonokriyo panggonane
Gombong iku kotane

Angine sumribit nggepyak awak
Alon rambute mbelah kabiyak
Wewengen kasuminar cahyaning rembulan
Mung siniji  sing jumedhul  langite lagi padhang
Sumorot wulane tesih ngadang
ngadang tumekane wong lanang
sing ninggal bayangan jroning awang-awang
apa dene ana lintang nanging ora sinandhing wulan

tanpa kumecap namung bisa mendhengi layang..

rina klawan wengi
namung bisa sesuwun marang gusti
Tumibane titiwanci
nggenepi  sucining janji
kanggo nyambangi
sepining ati..
mengerteni  yen  awakmu tansah tak wanti-anti  “Fernanda Rendy”
Sing lagi dadi juru mudhi
metu adhoh pulo jawi

adhuh...

kelingan yen lewat  dalan wingi
ana tlatah karang  njati
kelingan yen lagi nandhang  brangta sawiji
segara endhah  kaaran menganti
kadya hapsara lan hapsari
sucining  katresnan kembang mlathi
sinebar tumiba ing siti
manuk-manuk  oncat geguyuni
ora ngerti
banyu segara gumricik nidhoki
jebul udan riris sing teka ngancani
gandrung iki kudu di pungkasi

Pinggiring segara lumaku enggal bali
numpak sepedha kang hamunggrenggeng
warna ireng
Aku namung trima meneng
Tangane ngrogoh sak sing menga
banjur  ucul,
nyedhakepake tangane loro ana ngarep  weteng
mepetake awake ana geger sing lagi gemeter
awake gumrojos teles kebes
nanging ora karasa
ya namung katresnan sing di gawa 

Gambar kae
panggonan kae
lan janji-janji manis kae
pancen nyenengake

Wewayangan wayah awan- awan
sarwa endhah ana pikiran
ya ..namung gegambarane  sira
Perkasane Raden Gatutkaca
pakulitane Lir Bathara kreshna
gagah  pasuryane Arjuna
lan  baguse  Bathara kamajaya

Mesthine aku  lila
Aku ngetan awakmu ngulon
ngangsu kawruh kanggo pepadhanging urip sakloron
Siniji..Siniji....
ragane pisah atine sawiji...

Mbrebes  grimis riwis-riwis
Tumetes ora uwis-uwis
Janjimu pancen manis
ngajak dolan menyang paris
nanging sliramu...
mbok aja namung lamis
lan mburi ora agawe nangis
dadyaa  Lahang karoban manis...

Birune Banyu segara
tidhoki yen aku rindhu
Birune langit angkasa
tidhoki yen aku pengen ketemu
Bayu sing perkasa
tidhoki yen aku ana kene tansah ngenteni...
ngenteni.....
Baita sing kok tumpaki
Mugi-mugi enggala bali
nadyan aku ana gunung pati
Tanjung emas tak wanti-anti
Sliramu sing ndudut ati...

Sinom kang kinasih
Atiku namung siji
Tresna tulus lan suci
kanggo kangmas sawiji
ginawa nganti tumekane pathi
Mula sliramu sing satiti


Tumetes eluhku mlaku
namung sliramu jroning atiku
gambar kae banjur tak dekep
mugi-mugi  katresnan bali satuhu
nadyan aku sering keprungu
kelakuan tindak tandukmu
nanging becik pikiranku
Setya marang janjimu
Eling kangmas ! Segara biru nyekseni sliramu,

“Njagakake endhoge si blorok”
Apa sing di jaluk
Apa sing di pinginake
Apa sing di Karepake
apa namung cangkange
Apa pancen wis ana wanita liya ing sisihe?
embuh
Aku lila
yen pancene sliramu Cidra
Siji panyuwunku
Dudutana tali tresnanku
Kanggo tandha kadurjananmu!

Mangsa ketiga wus tiba
Katon wujud ayune Dewi Sri
winih-winih  wiwit di tanduri
Marang  bapak biyung tani
Sing mbiyen sliramu tekuni
Kacang ijo, kedele, lan pari,
Sekabehing  titahe gusti

Aku mangerteni 
yen aku taksih duwene bapak biyung lan gusti
Prayogane aku kudu ngabekti ,
uga ora lali,
Nandur kabecikan dhateng sesami,